Mtanzania,Mwananchi waonywa tena

WAZIRI wa Habari, Vijana, Utamaduni na Michezo, Dk Fenella Mukangara, amerudia kutoa onyo kwa wamiliki wa gazeti la Mtanzania na Mwananchi.

Katika onyo hilo alilolitoa jana, amemtaka mmiliki wa Mtanzania kuzingatia ratiba yao ya kutoa gazeti lao kila siku ya Alhamisi, la Rai na mmiliki wa Mwananchi, kuacha kuchapisha gazeti lao katika mtandao kama amri ya kufungiwa ilivyoainisha.

“Wamiliki wa gazeti la Mtanzania baada ya kufungiwa, wameamua kuligeuza gazeti la kila wiki la Rai kuwa la kila siku bila ya kibali cha Msajili wa Magazeti. Kwa mujibu wa ratiba, gazeti la Rai linapaswa kutoka kila siku ya Alhamisi,” alieleza Dk Mukangara katika taarifa yake kwa vyombo vya habari.

Wakati huo huo, Dk Mukangara amepokea maombi kutoka kwa wamiliki wa magazeti ya Mwananchi na Mtanzania wakiomba kupunguziwa adhabu au kusamehewa adhabu wanazozi tumikia kuanzia 27 Septemba, 2013.

Hata hivyo, Dk Mukangara amesema wakati anatafakari maombi hayo, amesikitishwa kuona kwamba magazeti haya mawili yamekiuka masharti ya adhabu walizopewa na kumlazimu kutoa onyo kwa mara nyingine.

Katika hatua nyingine, Kampuni ya Magazeti ya Mwananchi, imedai kupata hasara ya Sh milioni 400 kwa wiki mbili ambazo gazeti lake la Mwananchi lilikuwa limefungiwa.

Mkurugenzi Mtendaji wa kampuni hiyo, Tiddo Mhando, alisema hayo jana alipokuwa akizungumzia kurejea kwa uchapishaji wa gazeti hilo baada ya kumaliza kifungo hicho kilichotolewa na Serikali Septemba 27 mwaka huu.

Mhando alisema mbali na kiasi hicho kilichotokana na mauzo ya matangazo na magazeti, pia hasara ya Sh milioni 75 imetokea kwa watu mbalimbali waliopo nje ya kampuni hiyo.

“Tunatambua kuwa ndani ya majuma mawili haya jumuiya ya wafanyabiashara, taasisi na watu mbalimbali wameathirika kwa kukosa habari pamoja na fursa ya kutangaza nasi. Tunaahidi kuendelea pale tulipoishia kwa uzi ule ule kwa madhumuni ya kuwahabarisha wananchi,” alisema Mhando.

Alisema wiki mbili walizofungiwa, kwa kiasi zimeathiri maendeleo ya gazeti hilo pamoja na wafanyakazi wake na familia zao kutokana na mategemeo yao kwa gazeti hilo.

Aliiomba Serikali kuangalia kwa makini madhara ambayo jamii imepata kwa kufungia magazeti kulingana na sababu mbalimbali na kuongeza kuwa dhamira ya kampuni hiyo ni kuwapatia wananchi kile wanachostahili kwa namna wanayostahili kupata.

Source:Habarileo