Diwani CCM afungwa kwa wizi

na Salim Said Salim, Maswa

DIWANI wa Viti Maalumu, Mary Misanga (CCM), ametiwa hatiani na Mahakama ya Wilaya ya Maswa mkoani Simiyu na kuhukumiwa kifungo cha miaka saba gerezani.

Misanga (53) alipatikana na hatia ya wizi na kuhifadhi mali za wizi; mifuko miwili ya saruji na bati, mali ya Kampuni ya Kahama Oil Mill.

Akisoma hukumu hiyo juzi, hakimu wa mahakama hiyo, Thomson Mtani alisema kuwa ameridhika na ushahidi uliotolewa mbele ya mahakama hiyo.

Alisema kuwa kitendo kilichofanywa na mshitakiwa ambaye pia ni kiongozi si cha kiungwana na hakileti picha nzuri kwa jamii.

Hakimu Mtani aliongeza kuwa mshitakiwa alipatikana na mali ya wizi ambayo ni mifuko miwili ya saruji kati ya 100 iliyoibwa mara baada ya kuvunja stoo ya kiwanda hicho.

Pia mshitakiwa alikiri kupokea na kuhifadhi nyumbani kwake bati moja na mifuko miwili ya saruji, vyote vikiwa na thamani ya sh 146,000, mali ya Kiwanda cha Kahama Oil Mill.

Awali, mshitakiwa alifikishwa mahakamani hapo akikabiliwa na makosa hayo ambayo inadaiwa aliyatenda Juni 18 mwaka huu, saa 10:00 jioni katika Kijiji cha Hinduki wilayani Maswa.

Katika hatua nyingine, mahakama hiyo imewaachia huru watumishi watatu wa Halmashauri ya Wilaya ya Maswa huku ikiwahukumu wengine wawili kulipa faini ya sh milioni tano kila mmoja au kutumikia kifungo cha miaka mitatu jela baada ya kupatikana na hatia ya kula njama na kuisababishia hasara halmashauri hiyo kiasi cha sh 29,197,780.

Walioachiwa huru na hakimu Mtani baada ya kuonekana hawana hatia, ni Jackson Mashimba ambaye alikuwa boharia wa halmashauri hiyo, Sophia Alexender ambaye ni mtunza stoo na Omari Yahya ambaye ni fundi wa Idara ya Maji.

Mahakama hiyo iliwatia hatiani mhasibu wa halmashauri hiyo, Samson Sogoyo na Azimio Machibya ambaye pia ni Mkurugenzi wa Kampuni ya Kilalo General Makandaras ya mjini Bukombe mkoani Geita iliyopewa kazi ya kusambaza mabomba katika mradi wa maji ya Bukigi, Jihu na Malamapaka.

Washitakiwa kwa pamoja walifikishwa mahakamani na Taasisi ya Kuzuia na Kupambana na Rushwa (Takukuru) Aprili 14 mwaka 2011, wakidaiwa kula njama na kuwasilisha nyaraka za uongo kwa lengo la kumuibia mkurugenzi wa halmashauri ya wilaya ya Maswa sh 29,197,780.

Washitakiwa wote walikuwa wakitetewa wa wakili George Hezron huku upande wa mashitaka ukiongozwa na Mwanasheria Mwandamizi wa Serikali, Hashim Ngole.

Chanzo: Tanzania daima