Zitto awakwepa Slaa, Kinana, Seif

  Amwachia msalaba Filikunjombe

na Mwandishi wetu

WAKATI Oktoba 25 mwaka huu, Kamati ya Hesabu za Serikali (PAC), ikitarajia kuwaweka kikaangoni viongozi wa vyama vya siasa vya CCM, CHADEMA na CUF, walioshindwa kuwasilisha hesabu za ukaguzi wa fedha za ruzuku kwa miaka minne, Mwenyekiti wa Kamati hiyo, Zitto Kabwe hatakuwepo.

Mwanzoni mwa wiki iliyopita, Zitto alimuagiza Msajili wa Vyama vya Siasa, kutovipa ruzuku ya serikali vyama vya siasa vinavyostahili hadi pale ukaguzi wa mahesabu utakapofanywa.

Zitto alifikia hatua hiyo baada ya Mkaguzi Mkuu wa Serikali (CAG), kuieleza kamati hiyo kuwa hajapokea ripoti yoyote ya mahesabu kutoka kwa vyama hivyo tangu mwaka 2009.

Kwa mujibu wa mwenyekiti huyo, shilingi bil. 67.7 hazijakaguliwa kwa vyama vyote vya siasa kwa miaka minne sasa tangu mwaka 2009.

Kutokana na kadhia hiyo, Zitto pia alimuagiza Msajili wa Vyama vya Siasa kuwaandikia barua ya kisheria makatibu wakuu wa vyama vinane vinavyopata ruzuku ya serikali kufika kwenye kamati yake Oktoba 25, mwaka huu kujieleza kwanini hawakuwasilisha ripoti zao.

Miongoni mwa makatibu wakuu hao ni Abdulrahman Kinana (CCM), Dk. Willibrod Slaa (CHADEMA), Maalim Seif Sharif Hamad (CUF) na Sam Ruhuza (NCCR-Mageuzi).

Vyama vingine vinavyopokea ruzuku nchini ni TLP, DP, UDP na APPT- Maendeleo.

Zitto aenda Uswisi

Zitto amealikwa Uswisi na Shirika la Kimataifa la Mtandao wa Ulaya wa Madeni na Maendeleo (Eurodad) kufanya ziara ya kiuchunguzi kuhusu masuala ya uwazi katika kodi katika nchi hizo kuanzia leo hadi Novemba 5.

Kwa mujibu wa taarifa iliyotolewa na Zitto, uchunguzi huo utaendeshwa na wataalamu waliobobea wa masuala ya kodi na maendeleo.

Eurodad ni mtandao wa mashirika yasiyo ya kiserikali yapatayo 48 kutoka nchi 19 za Ulaya ambayo yanajihusisha na masuala ya kufutia madeni nchi zilizoendelea, misaada yenye maana na kodi za haki.

Taarifa hiyo ilibainisha kuwa mashirika hayo yamekuwa kwenye kampeni ya kupinga utoroshwaji wa fedha kupitia ukwepaji kodi unaofanywa na mashirika ya kimataifa kwa nchi zinazoendelea.

Zitto amekuwa mmoja wa wabunge wanaosimamia hoja ya kutaka Watanzania waliotorosha fedha kwenda nje (Uswisi) warejeshe na kufunguliwa mashitaka.

Mwaka 2012 aliwasilisha hoja binafsi bungeni na kupitishwa kuwa Azimio la Bunge ya kutaka uchunguzi kuhusu utoroshwaji wa fedha na kufichwa nje.

Kikosi kazi cha serikali kwa ajili ya kutekeleza azimio hilo la Bunge kinatarajia kuwasilisha taarifa yake katika Mkutano wa 16 wa Bunge.

Zitto alibainisha kuwa kesho atakutana na Waziri wa Fedha wa Uswisi na maofisa wa mabenki na asasi zisizo za kiserikali zilizopo jijini Geneva.

Alibainisha kuwa atahudhuria mkutano wa Kamati ya Kodi ya Umoja wa Mataifa katika kampeni ya kubadili mfumo wa kodi za kimataifa ili kuzuia unyonyaji wa nchi za Kiafrika unaofanywa na kampuni kubwa za kimataifa.

Zitto pia atatembelea Luxembourg na Brussels kabla ya kwenda Norway ambako atamalizia ziara yake kwa jopo la wataalamu wa masuala ya kodi na maendeleo kuandika taarifa maalumu yenye mapendekezo kuhusu kuzuia utoroshaji wa fedha kutoka Afrika.

Pia kiongozi huyo atakwenda London kutoa mada kuhusu masuala ya kodi za kimataifa katika mkutano wa uwazi (Open Government Partnership).

Mwenyekiti huyo wa PAC Tanzania atafanya mazungumzo na Mwenyekiti wa PAC Uingereza kuhusu masuala mbalimbali ya ushirikiano wa mabunge mawili.

Aacha gumzo

Wakati Zitto akiwa safarini, gumzo kubwa limetawala maeneo mbalimbali juu ya hatua yake ya kuvisulubu vyama vya siasa kikiwemo CHADEMA ambacho yeye ni mmoja wa viongozi wake, akiwa Naibu Katibu Mkuu bara.

Mijadala hiyo inatokana na hatua ya CHADEMA kukana na kuweka wazi nyaraka za ukaguzi wa fedha kwa mwaka 2010/2011 walizoziwasilisha ofisini kwa Msajili wa Vyama vya Siasa.

Kutokana na Zitto kuwa safarini, viongozi hao wa vyama vya siasa sasa watakutana na Makamu Mwenyekiti wa PAC, Deo Filikunjombe.

Chanzo: Tanzania Daima