SIMULIZI YA HEKAYA ZA MLEVI

Kwa ufupi

    Hata hivyo, kazi yangu naikubali pamoja na ugumu wake. Siku nyingine huwa napokea maswali ya “Nifanyeje ili anirudie”, “Natafuta mchumba” na kadhalika. Watu wakishasikia wewe ni Mwenyekiti wa Mtaa basi wanakuletea hadi matatizo ya ndoa zao.

“We mama lete kinywaji! Nusu saa nzima? Au bia ndiyo inapikwa?” Nilibwata kwa hasira maana subira ilishanichosha. Sijui kwa nini Wabongo hatujali muda. Hapa hapa niliwahi kuagiza kuku nikasubiri saa nzima. Kana kwamba mchinjaji ndiyo alikuwa akimfukuza huyo kuku.

Yule mama (ukweli alikuwa binti, lakini watu wabaya walikwisha kumchosha) akainuka bila neno, akaenda kunichukulia kinywaji. Sikuacha kumpa maneno yake: “Ukitaka kufanikiwa kazini ni lazima uipende kazi yako…”

“Ongea mengine bwana we! Niwe na kazi mie (akataja kabila)?” Nikaufyata.

Kabla sijapiga funda, mgeni alisimama mbele ya meza yangu: “Habari gani Mheshimiwa!”

“Nilitua chupa mezani: “Nzuri ndugu, karibu.”

Alivuta kiti pasi na kujibu. “Mimi sitaki lawama, bali nimekuja kukuambia ukweli…”

He! Yameshakuwa hayo tena? Mwenyewe nimekuja mahala tulivu nikate kiu na kupoza machungu ya kazi za mchana kutwa, mara nimegeuzwa kuwa Pilato?

Hata hivyo, kazi yangu naikubali pamoja na ugumu wake. Siku nyingine huwa napokea maswali ya “Nifanyeje ili anirudie”, “Natafuta mchumba” na kadhalika. Watu wakishasikia wewe ni Mwenyekiti wa Mtaa basi wanakuletea hadi matatizo ya ndoa zao.

Anyway, nilimuuliza kulikoni? Kwa hasira alianza kubwata hadi nilifunika uso kwa mate yalivyomruka: “Wewe ni mwizi! Tena huna haya hata kidogo! Mimi ndiye mlevi orijino, lakini huko mtaani watu wote wanakuita wewe mlevi. Umeniibia jina langu!”

Nilishangaa sana.

Ghafla nikawa na hamu ya kumwangalia vizuri. Ni kweli alikuwa na ndevu za ovyo ovyo, ngeu mbili tatu usoni na ukosefu wa meno ya barazani. Koti lake jeusi lililobadilika na kuwa la rangi ya udongo lilimwongezea CV ya wadhifa huo.

“Unaitwa nani?” Niliuliza ili nipate uhakika kwamba naongea na mtu timamu. Usije kushangaa meza inasambaratishwa na unaachiwa deni la chupa zilizovunjwa.

“Yahaya ei kei ei Mlevi. Uliza Kwa Mfuga Mbwa wote wananijua.” Alijibu kwa kujiamini.

“Unaitwa Yahaya au unajiita Yahaya?” Niliuliza tena.

“Nimekambia naitwa Yasini. Babaangu mwenyewe ndo kanigea jina hilo.”

“Mpo Yahaya wangapi hapa duniani?” Nikaendelea kuhoji maana niligundua kuwa pamoja na baadhi ya skurubu kukosekana ubongoni mwake, bado alimaanisha alichokisema.

“Hizo dharau sasa…” Aling’aka. “We unaweza kuniambia mko walevi wangapi hapa mjini?” Unaona sasa, hata yeye kaniita Mlevi.

“Kwa hiyo unakasirika mwenzio akiitwa Yahaya?” Nilimuuliza badala ya kumjibu.

“Nshakuambia hizo dharau… Ni lazima tuelewane la sivyo patachimbika hapa!”

“Unataka kuniambia hilo koti ni wewe ndiye uliyelianzisha?”

“Ohoooooooo…”

Alileta mzozo hadi baunsa wa baa ile alipokuja kumtoa. Kweli siku mbaya huonekana kungali mapema. Hata hivyo niligundua kitu. Watu wengi hufikiri kuwa kila wanachokiona ni kitu kipya, kumbe ni kipya kwao.

Mwenyezi Mungu alipouumba ulimwengu, tunaambiwa kuwa alitumia siku sita. Kuanzia Jumangapi hilo usiniulize, ila ndani ya siku hizo kila kitu kiliumbwa. Kinachoonekana kama udongo na hata kisichoonekana kama upepo. Hakuna kitu kipya hata kimoja kilichozuka baadaye.

Kinachofanyika sasa ni uharibifu tu. Mtu anaponda udongo na chokaa kisha anaita sementi. Mwingine anasaga mahindi na kuita unga: uwe wa chapa hii au ile, bado ni kitu kilekile; unga. Pamba ikageuzwa nguo, ngozi ikawa kiatu, shayiri ikawa bia, zabibu ikawa mvinyo, papai likawa gongo… aaaah! Huku tunakowenda sasa siko.

Lakini hakuna jipya chini ya jua. Ebu tuangalie mfano hai, au nikuulize swali hai: Ni nyimbo ngapi ambazo umewahi kuzisikia zinazoitwa “Nakupenda”. Iwe “Nakupenda Salima”. “Mariam Nakupenda” au vyovyote vile. Jibu ni kwamba hujui idadi yake. 

 Hata muda huu tunapoongea yupo kijana na rundo la makaratasi, anarekodi wimbo wake utakaokwenda kwa jina la “Nakupenda” sijui nani. Hapa inategemea: Juu ya makaratasi kumeandikwa “Nakupenda Halima”. Lakini kesho Halima akileta pozi kichwa cha habari kitageuka kuwa “Nakupenda Monika” ili mradi Monika aonyeshe “ushirikiano” wa kutosha. Alamsiki.