Ni Man United v Bayern, Chelsea na PSG Ulaya

DUH! Kifo. Ndicho unachoweza kusema kwa Manchester United hii ya msimu huu baada ya kupangiwa Bayern Munich kwenye robo fainali ya Ligi ya Mabingwa Ulaya.

Wawakilishi wengine wa England, Chelsea nao wanakabiliwa na kibarua kigumu baada ya kupangwa na matajiri wa Ufaransa, Paris St-Germain.

Klabu hizo za England zimepangwa na timu ngumu huku mabingwa watetezi wa Ligi Kuu England, Man United, wakionekana kuwa na mtihani mgumu zaidi mbele ya wababe wa Ujerumani, Bayern Munich ambao msimu huu wamekuwa hatari sana chini ya kocha mpya, Pep Guardiola.

Katika ratiba iliyopangwa jana Ijumaa, mechi nyingine za hatua hiyo ya robo fainali, Barcelona wataanzia nyumbani dhidi ya Wahispaniola wenzao, Atletico Madrid katika mechi inayotarajiwa kuwa ngumu zaidi wakati Real Madrid watachuana na wabaya wao wa msimu uliopita, Borussia Dortmund kutoka Ujerumani.

Mechi za kwanza zitafanyika Aprili 1 na 2, wakati mechi za marudiano zitafanyika Aprili 8 na 9 mwaka huu, huku fainali ya michuano hiyo ikitarajia kufanyika Mei 24 katika Uwanja wa Estadio da Luz mjini Lisbon, Ureno.

Gumzo zaidi ni Man United, ambao walitinga hatua hiyo kwa staili ya aina yake baada ya kuyapangua matokeo ya kichapo cha mabao 2-0 mbele ya Olympiakos na kisha kushinda 3-0 uwanjani Old Trafford. Lakini, mtihani wa sasa unaowakabili ni mgumu katika harakati zao za kutinga nusu fainali.

Kocha Mkuu wa Man United, David Moyes, anaamini kikosi chake kitasonga mbele baada ya kuitupa nje Olympiakos, lakini sasa atamvaa Guardiola ambaye aliitupa nje Arsenal kwenye mechi za mtoano hatua ya 16 bora.

Bayern Munich, ambao waliitupa nje Man United kwenye michuano hiyo mwaka 2010 baada ya bao safi la Arjen Robben, msimu huu ilizibwaga Manchester City, CSKA Moscow na Viktoria Plzen kwenye kundi lake.

Chelsea inakabiliwa na mtihani mzito mbele ya Zlatan Ibrahimovic, wakati Barcelona itacheza dhidi ya wapinzani wao kwenye La Liga, Atletico Madrid, ambao msimu huu wamekuwa hatari zaidi chini ya kocha wao Diego Simione.

Real Madrid itakuwa na nafasi ya kulipa kisasi cha kutupwa nje msimu uliopita baada ya kupangwa na Borussia Dortmund kwenye hatua hiyo ya robo fainali.

Msimu uliopita, Real Madrid iliyokuwa chini ya Jose Mourinho ilitupwa nje kwa jumla ya mabao 4-3.

Chanzo: Mwanasipoti