Jaji Warioba asilaumiwe kwa Rasimu ya Katiba

Mwenyekiti wa Tume ya Mabadiliko ya Katiba, Jaji Mstaafu Joseph Warioba (kulia) akiwasilisha Rasimu ya Pili ya Katiba katika Bunge Maalumu la Katiba mjini Dodoma jana. Picha na Salim Shao.  

KWA UFUPI

• Wakizungumza nje ya Viwanja vya Bunge Freeman Mbowe, Silyvester Kasulumbai na Paul Kimiti, walisema alichowasilisha Jaji Warioba bungeni,siyo maoni yake binafsi.

Na Mussa Juma, Mwananchi

Baadhi ya Wajumbe wa Bunge la Katiba, wamewataka wenzao kuacha kutoa tuhuma za kumlaumu, Mwenyekiti wa Tume ya Mabadiliko ya Katiba, Jaji Joseph Warioba kutokana na Rasimu ya pili aliyoiwasilisha bungeni, badala yake wajiandae kutetea misimamo yao.

Wakizungumza nje ya Viwanja vya Bunge Freeman Mbowe, Silyvester Kasulumbai na Paul Kimiti, walisema alichowasilisha Jaji Warioba bungeni,siyo maoni yake binafsi.

Mbowe ambaye pia ni Mbunge wa Jimbo la Hai, alisema ni makosa makubwa kuanza kumlaumu Jaji Warioba, kwani alichowasilisha ni maoni ya wananchi yaliyokusanywa yana tume nzima ya Mabadiliko ya Katiba.

“Mzee Warioba pia ametumia taarifa za tume ambazo iliundwa na Serikali na pia uamuzi wa Chama Cha Mapinduzi (CCM), hivyo kumtupia lawama yeye ni kumvunjia heshima yake”alisema

Mjumbe Kasulumbai ambaye pia ni Mbunge wa Jimbo la Maswa Mashariki, alisema hakubaliani na wanaomlalamikia Jaji Warioba kwani anaamini ametoa Rasimu ya umma.

Alisema kama angekuwa na uwezo , Rasimu ya Jaji Warioba ingepita kama ilivyo kwani inawakilisha maoni ya umma.

“Kama ni mimi ningeipitisha yote kama ilivyo kama kurekebisha ni mambo madogo sana na nashangaa wanaomtuhumu na kumpinga na wafuasi wenzake wa CCM,”alisema

Kwa upande wake Kimiti alisema anamheshimu jaji Warioba na alichofanya ni kuwasilisha bungeni maoni ya wananchi.

“Binafsi najua mzee Warioba ameeleza kwa uwazi bila kuficha na haya ni maoni ya wananchi na utafiti wa uliofanywa naTume hivyo muhimu ni kutafakari na kujiandaa kwa mjadala”alisema.

Tangu Jaji Joseph Warioba kuwasilisha rasimu bungeni, kumeibuka mjadala mzito miongoni mwa wajumbe wa bunge la Katiba na baadhi wamekuwa wakimpinga kwa madai  sehemu kubwa ya maoni ni ya Jaji Warioba.

Chanzo: Mwananchi