KAULI ZA WASOMI KUHUSU HOTUBA YA JK

Dar es Salaam. Wasomi na wachambuzi wa masuala ya kisiasa wameikosoa hotuba ya Rais Jakaya Kikwete aliyoitoa bungeni juzi, huku wengine wakisema inaweza kulivunja Bunge Maalumu la Mabadiliko ya Katiba.

Akifungua Bunge Maalumu la Katiba juzi mjini Dodoma, Rais Kikwete alichambua hotuba iliyowasilishwa na Mwenyekiti wa Tume ya Katiba, Jaji Joseph Warioba na kuwataka wajumbe kuukwepa muundo wa Serikali tatu kwa kuwa hautekelezeki.

Kauli ya Rais Kikwete imekuja wakati ambapo tayari CCM imeshaweka wazi msimamo wa kupinga muundo wa Serikali tatu uliopendekezwa katika Rasimu ya Katiba.

Akizungumzia hotuba ya Rais Kikwete, Mhadhiri Mwandamizi Chuo Kikuu cha Dar es Salaam, Profesa Gaudensia Mpangala, alisema maoni ya Rais yametolewa katika wakati usiofaa.

Akifafanua, Mpangala alisema Rais alipaswa kupinga muundo wa Serikali tatu wakati wa kutoa maoni kwenye Rasimu ya Kwanza ya Katiba na siyo sasa.

“Yaani hotuba imefumua rasimu yote, sijui itakuwaje. Ameleta utata zaidi. Alitakiwa kutoa uchambuzi wa mazuri na changamoto za Serikali mbili na tatu wakati ule, siyo sasa mjadala umepamba moto,” alisema Mpangala.

Aliongeza kuwa hotuba ya Rais imewaacha njia panda wajumbe wanaounga mkono Serikali tatu, kwa kuwa ilionekana kutekeleza maoni ya CCM ambayo ‘inapigania’ serikali mbili.

Pia, alikosoa sababu zilizotolewa na Rais kuwa Serikali tatu itaua utaifa na kuanzisha uhasama miongoni mwa wananchi na kwamba serikali hiyo haitakopesheka.

“Uhasama utatoka wapi wakati kutakuwa na katiba na sheria zinazofuatwa?…siyo kweli kwamba Tanganyika haitakopesheka, kwani itakuwa ndiyo nchi ya kwanza kufanya hivyo?” alihoji Mpangala.

Mchambuzi mkongwe wa masuala ya kisiasa nchini, Dk. Ezavel Lwaitama alisema hotuba ya Rais ililenga kufuta maoni yaliyokuwa yamewasilishwa na Jaji Warioba.

“Hotuba ile ilipangwa makusudi ili kufuta walioshawishiwa na Jaji Warioba, ingawa siamini kama wanaotaka Tanganyika watakuwa wamebadilisha msimamo wao,” alisema Dk. Lwaitama.

Dk. Lwaitama alisema mchakato wa kutaka Serikali mbili unashabikiwa na baadhi ya watu wenye nia ya kugombea urais.

“Ukiangalia kwa makini utagundua kuwa hata wanaopigania kura ya wazi bungeni ni wale ambao wanataka kugombea urais wa Zanzibar na Tanzania,” aliongeza.

Naye Mhadhiri Mwandamizi wa Chuo Kikuu cha Dar es Salaam, Dk Benson Bana alisema iwapo Bunge la Katiba litaichukulia hotuba ya rais kama ni mwongozo, bunge hilo linaweza kuvunjika.

Alisema alichokifanya Rais ni kutoa dukuduku lake, hivyo kama kuna mtu anahoja anaweza kuzijibu ili kupata katiba inayokubalika na wengi.

“Rais alichelewa kutoa maoni kwenye Tume ya Warioba, alichokisema wasikichukulie kuwa dira, wasome hotuba yake sentensi kwa sentensi na ibara kwa ibara kama yeye mwenyewe alivyosema ndiyo wataielewa,” alisema Bana.

Chanzo: Mwananchi