Yanga: Simba wakitufunga, tunavunja timu

By DORIS MALIYAGA

SIMBA imetamba kuwa Yanga ikipona sana kwenye mechi ya watani wa jadi Jumapili itakula mabao 3-0. Lakini Yanga wamejibu kwamba kama ikitokea hivyo watavunja timu.

Kocha Msaidizi wa Yanga, Fred Felix Minziro ametamka kwamba wachezaji kama; Athumani Idd ‘Chuji’ na Mnyarwanda Haruna Niyonzima ‘Fabregas’ wamepania kuwaziba midomo Simba hasa kocha wao msaidizi, Jamhuri Kihwelu ‘Julio’, ambaye amekuwa akiwapiga vijembe.

Yanga, ambayo imejificha kisiwani Pemba ikiwa na wachezaji wake wote akiwamo, Salum Telela aliyekuwa majeruhi na jana Jumatatu walipofika tu kutoka Dar es Salaam, walifanya mazoezi ya nguvu mchana kweupe, kuanzia saa sita hadi saa nane kwenye Uwanja wa Gombani.

Minziro alisema: “Tunatengeneza timu sehemu zote ili siku hiyo, kila mchezaji awe fiti. Tulishinda mechi na Kagera Sugar (2-1) kulikuwa na upungufu kadhaa ambao pia tunayafanyia kazi, lakini siwezi kuuweka wazi ni siri yetu.”

“Tumezisikia tambo za Simba na Julio (Jamhuri Kihwelo) wanaongea tu, lakini wafahamu kuwa mpira dakika 90, hiyo kauli yao ya kuwa watatufunga mabao 3-0, mimi nasema wakifanya hivyo tunavunja timu, hivi timu yenyewe ipo wapi ya kutufunga?” Alisema Minziro kwa kujiamini.

“Atambue kuwa, hao wachezaji anaowatajataja kama, Chuji na Niyonzima ni kama amewachochea, wameupania vilivyo mchezo huo, watamwonyesha soka la uhakika hadi ashangae, ataona mwenyewe. Sisi ni watendaji tu, hatutaki maneno mengi, ninachowaambia mashabiki wa soka hasa wa Yanga, wafike kwa wingi kushuhudia kikosi chao kitakavyofanya vizuri,” alisema Minziro.

Akizungumzia sababu ya kufanya mazoezi jana Jumatatu mchana, Minziro alisema programu yao ni kama kawaida, lakini ni kwa sababu walifika muda huo na jioni kulikuwa na mechi.

Yanga msimu uliopita kwenye mechi ya mwisho iliifunga Simba mabao 2-0 ikiwa imetokea kwenye kambi hiyo hiyo ya Pemba.

Wiki iliyopita Julio alitamba kikosi chao kitawafunga Yanga mabao 3-0.