CCM sasa wapingana na Bodi ya Korosho

Aidha halmashauri hiyo imeiagiza Serikali mkoa ihakikishe katika msimu huu mkulima analipwa malipo yake yote. PICHA|MAKTABA  

Na Abdallah Bakari,Mwananchi

Mtwara. Chama Cha Mapinduzi (CCM) mkoani hapa kimepingana na Bodi ya Korosho Nchini (CBT) juu ya tafsiri ya bei dira ya zao hilo katika msimu 2013/14, huku kikiwataka wakulima kuwa makini ili haki na maslahi yao yasiporwe na wajanja wachache.

Kwa mujibu wa taarifa iliyotolewa na chama hicho kwa waandishi wa habari na kusainiwa na Katibu wa chama hicho mkoani hapa, Shaibu Akwilombe,uamuzi huo ulifikiwa Oktoba,12 mwaka huu mjini Mtwara.

Alisema halmashauri kuu ya mkoa baada ya kukutana katika kikao kilichofanyia mjini hapa, wajumbe walifikia uamuzi wa kutokubaliana na mwongozo wa mauzo ya korosho uliotolewa na Bodi ya Korosho Tanzania (CBT) Oktoba, 2013.

Akwilombe katika taarifa yake hiyo alifafanua zaidi kuwa, kwa mujibu wa tafsiri ya CBT, bei dira sio kinga ya bei kwa wakulima wa korosho kitendo alichokidai kinatoa mwanya kwa watendaji wasio waaminifu kujinufaisha na zao hilo. “Tafsiri hii mpyainaondoa na kufuta maana sahihi ya Mfumo wa Stakabadhi Ghalani bali inajenga mazingira ya kuwandaa wakulia kudhulumiwa…katika hili tunasema hapana,”.

Aidha halmashauri hiyo imeiagiza Serikali mkoa ihakikishe katika msimu huu mkulima analipwa malipo yake yote ndipo makato yanayotozwa na vyama vya ushirika na halmashauri za wilaya yafuate ili kumlinda mkulima kubeba mzigo wa hasara.

Mkurugenzi wa CBT,Juma Mfaume Mkanachapa alisema,“Pesa ya malipo ya awali ni ya mkulima mwenyewe, ilitakiwa mkulima akusanye korosho na kuzikabidhi kwa chama cha ushirika,zikiuzwa afuate fedha zake kwa mujibu wa soko sio bei dira”alisema.

Chanzo: Mwananchi